अॅड. धन्यकुमार गुंडे यांची शिवाजी विद्यापीठास सदिच्छा भेट

कोल्हापूर : राष्ट्रीय अल्पसंख्याक आयोगाचे सदस्य अॅड. धन्यकुमार जिनाप्पा गुंडे यांनी आज शिवाजी विद्यापीठास सपत्नीक सदिच्छा भेट दिली.

अॅड. धन्यकुमार गुंडे हे कोल्हापूर जिल्हा दौऱ्यावर आले होते. त्यांचे  सकाळी कुलगुरू डॉ. दिगंबर शिर्के यांनी आपल्या दालनामध्ये शाल, स्मृतिचिन्ह व ग्रंथ भेट देऊन स्वागत केले. त्यांच्या पत्नी सौ. निर्मला गुंडे यांचाही शाल व ग्रंथभेट देऊन सत्कार केला. यावेळी अॅड. गुंडे यांनी आपण शिवाजी विद्यापीठाचे माजी विद्यार्थी असल्याचा अतिशय अभिमान असल्याचे नमूद केले. त्याचप्रमाणे देशातील विद्यार्थ्यांमध्ये ‘राष्ट्र प्रथम’ ही सर्वोच्च भावना रुजविण्यासाठी सातत्याने प्रबोधन व कार्य करीत असून त्यासाठी पदाचा सदुपयोग करीत राहणार असल्याचेही सांगितले. शिवाजी विद्यापीठाच्या भगवान महावीर अध्यासनाच्या कार्याविषयीही त्यांनी कौतुकोद्गार काढले. यावेळी कुलगुरू डॉ. शिर्के यांनी, विद्यापीठातील सामाजिक वंचितता व समावेशन धोरण केंद्र, लोकविकास केंद्र आदी केंद्रांच्या माध्यमातून अल्पसंख्याकांसह वंचित घटकांच्या उत्थानाच्या अनुषंगाने अभ्यास व संशोधन करण्यास विद्यापीठाचे प्राधान्य असल्याचे सांगितले. त्याचप्रमाणे सामाजिक-आर्थिक धोरण निश्चिती व निर्मिती यांसाठी आवश्यक माहिती पुरवून योगदान देण्यासाठी अध्यासनांनी काम करण्यासाठी प्रेरित करण्यात येत असल्याचेही सांगितले.

या भेटीनंतर अॅड. गुंडे यांनी विद्यापीठाच्या भगवान महावीर अध्यासनाचे कार्य, संशोधन आणि प्रस्तावित इमारत प्रकल्पाची माहिती घेतली. यावेळी प्र-कुलगुरू डॉ. प्रमोद पाटील, कुलसचिव डॉ. विलास शिंदे, डॉ. विजय ककडे, महावीर अध्यासनाच्या सल्लागार समितीचे सदस्य अनिल पाटील, डी.ए. पाटील, डॉ. चंद्रकांत चौगुले आदी उपस्थित होते.