‘स्पार्क’ला भरभरून प्रतिसाद

कोल्हापूर( प्रतिनिधी):  शिवाजी विद्यापीठाच्या पद्मश्री डॉ. ग. गो. जाधव पत्रकारिता अध्यासनाच्या वतीने सुरू असलेल्या सर्टिफिकेट कोर्स इन डॉक्युमेंट्री फोटोग्राफीच्या विद्यार्थ्यांनी काढलेल्या छायाचित्रांच्या ‘स्पार्क’ प्रदर्शनाला रसिकांकडून भरभरून प्रतिसाद मिळाला. विद्यार्थी, शिक्षकांसह समाजाच्या वेगवेगळ्या स्तरातील नागरिकांनी फोटो प्रदर्शन पाहण्याचा आस्वाद घेतला.
कुलगुरू प्रा. डॉ. डी. टी. शिर्के यांच्या हस्ते प्रदर्शनाचे उद्घाटन झाले होते. यानंतर शिवाजी विद्यापीठासह कोल्हापुरातील अनेक नामवंत छायाचित्रकार, कलाकार तसेच विद्यार्थ्यांनी प्रदर्शनाला भेट दिली. शिवाजी विद्यापीठाचे अनेक कर्मचारी आणि अधिकारी तसेच विविध विभागातील शिक्षकांनीही प्रदर्शन पाहिले. विद्यापीठात फोटोग्राफीचा कोर्स सुरू होऊन अवघा दीड महिना झाला आहे. या काळात विद्यार्थ्यांनी शिक्षकांच्या मदतीने फिल्डवर जाऊन फोटोग्राफी केली. यातील निवडक फोटोंच्या प्रदर्शनाला समाजातील विविध स्तरातून चांगला प्रतिसाद मिळाला. हे फोटोग्राफी प्रदर्शन यशस्वी करण्यासाठी शिक्षक जयसिंग चव्हाण, विराज चव्हाण, राहुल शहा, अभिजित गुर्जर आदींनी परिश्रम घेतले. प्रदर्शनात सहभागी झालेल्या सर्व विद्यार्थ्यांना मान्यवरांच्या हस्ते प्रमाणपत्रांचे वितरण केले जाणार आहे, अशी माहिती कोर्सचे समन्वयक डॉ. शिवाजी जाधव यांनी दिली.