अनयाज चेस क्लबच्या शालेय शास्त्रीय सराव बुद्धिबळ स्पर्धा

कोल्हापूर  :- चंदवाणी हॉल,ताराबाई पार्क, कोल्हापूर येथे गेली दोन दिवस सुरू असलेल्या व अनयाज चेस क्लब ने आयोजित केलेल्या नऊ,बारा व पंधरा वर्षाखालील शालेय मुलांच्या शास्त्रीय सराव बुद्धिबळ स्पर्धा आज संपन्न झाल्या.

नऊ वर्षाखालील मुलांच्या गटात अंतिम सहाव्या फेरीत पाच गुणासह आघाडीवर असलेल्या अग्रमानांकित संजय घोडावत इंटरनॅशनल स्कूलच्या शौर्य बगडिया श्रद्धा ओलंपियाड स्कूलच्या वेदांत बांगड वर विजय मिळवत सहापैकी सहा गुण मिळवून अपेक्षेप्रमाणे अजिंक्यपद पटकाविले. द्वितीय मानांकित न्यू हायस्कूलच्या अर्णव हरीश पाटीलने सृजन आनंद विद्यालयाच्या श्रीहर्ष रानडे वर मात करीत पाच गुणांसह उपविजेतेपद पटकाविले तर तिसऱ्या पटावर तृतीय मानांकित सेंट पॉल्स स्कूल,अतिग्रे च्या आदित्य ठाकूरने व्यंकटेश्वरा इंग्लिश स्कूल च्या रौनक झंवर चा पराभव करून पाच गुणांसह तृतीय क्रमांक मिळविला.

बारा वर्षाखालील मुलांच्या गटात सहाव्या फेरीत चुरशीने झालेल्या लढतीत पहिल्या पटावर पाच गुणासह आघाडीवर असलेल्या छत्रपती शाहू विद्यालयाच्या अंशुमन शेवडेला कोल्हापूर पब्लिक स्कूलच्या राजदीप पाटील ने पराभवाचा धक्का दिला.दोघांचे समान पाच गुण झाल्यामुळे सरस बकोल्झ् टायब्रेक गुणानुसार अंशुमन ने अजिंक्यपद ला गवसणी घातली तर राजदीप ला उपविजेतेपदावर समाधान मानावे लागले. दुसऱ्या पटावर अग्रमानांकित पोदार इंटरनॅशनल स्कूलच्या अरिना मोदी ला तात्यासाहेब मुसळे स्कूलच्या अथर्व तावरे ने बरोबरीत रोखल्यामुळे अरिना ला साडेचार गुणांसह तृतीय स्थानावर संतुष्ट व्हावे लागले.

पंधरा वर्षाखालील गटात अंतिम सहाव्या फेरीत पहिल्या पटावर अग्रमानांकित विमला गोयंका इंग्लिश मीडियम स्कूलच्या शंतनू पाटील व तृतीय मानांकित सेवंथ डे स्कूलच्या महिमा शिर्के यांच्यातील डाव बरोबरीत सुटला दोघांचे समान साडेपाच गुण झाले सरस बकोल्झ् टायब्रेक गुणामुळे शंतनूला अजिंक्यपद मिळाले तर महिमाला उपविजेतेपदावर समाधानी व्हावे लागले. पाचवा मानांकित न्यू स्कूलचा नारायण पाटील ने सेंट पॉल्स स्कूलच्या अपूर्व ठाकूर ला पराभूत करून तृतीय स्थान मिळविले.
तिन्ही गटातील विजेत्यांना रोख बाराशे रुपये व चषक उपविजेत्यांना रोख एक हजार रुपये व चषक तर तृतीय क्रमांक ला रोख आठशे रुपये व चषक देऊन गौरविण्यात आले.स्पर्धेचा बक्षीस समारंभ प्रिसाईज हायस्पीड स्पिंडल सर्विस सेंटरचे मनीष देशपांडे,माधव होमिओपॅथिक क्लिनिकचे डॉक्टर संतोष रानडे,रोटरी क्लब कागलच्या अध्यक्षा दीपा देशपांडे, चंदवाणी हॉल ट्रस्टच्या चेअरमन विजया पामनाणी व संगीत आणी गायन क्षेत्रातील जाणकार मुकुंद मारुलकर यांच्या हस्ते करण्यात आला.यावेळी व्यासपीठावर महाराष्ट्र बुद्धिबळ संघटनेचे सहसचिव व आंतरराष्ट्रीय पंच भरत चौगुले , प्रशिक्षक उत्कर्ष लोमटे व वरीष्ठ राष्ट्रीय पंच आरती मोदी उपस्थित होते.मुख्य स्पर्धा संयोजक मनीष मारुलकर यांनी शेवटी सर्वांचे आभार मानले.