‘धरणामध्ये xxx पेक्षा… थुंकणं चांगलं’- संजय राऊत

शिंदे गटाचे खासदार श्रीकांत शिंदे यांच्यासंदर्भात प्रश्न विचारताच ठाकरे गटाचे प्रवक्ते संजय राऊत काल ऑन कॅमेरा थुंकले होते. त्यांच्या या कृतीचे राज्यभर पडसाद उमटत आहेत. शिंदे यांच्या शिवसेनेकडून जोरदार टीका करण्यात येत आहे. याबाबत आज माध्यमांशी बोलताना त्यांनी राष्ट्रवादीचे नेते अजित पवार यांच्यावर टीकाही केली आहे. राजकीय नेत्यांनी बोलताना, कृती करताना तारतम्य बाळगावं असं विरोधी पक्षनेते अजित पवारांनी संजय राऊतांचं नाव न घेता सुनावलं.

 ठाकरे गटाचे खासदार संजय राऊत आणि अजित पवार यांच्यात पुन्हा जुंपलीय. अजित पवारांना प्रत्युत्तर देताना राऊत यांची जीभ पुन्हा घसरली. नेत्यांनी तारतम्य बाळगावं असं विरोधी पक्षनेते अजित पवारांनी राऊतांना सुनावलं. त्यावर पलटवार करताना राऊतांनी पातळी सोडून टीका केली. मात्र राऊत बोलल्याने अंगाला भोकं पडत नाहीत असं प्रत्युत्तर अजित पवार यांनी दिले आहे. 

याबाबत संजय राऊत यांनी आपली प्रतिक्रिया देताना आपल्या थुंकण्याचे समर्थन केले. त्यांनी सावरकर यांचे उदाहरण दिले. सावरकरही थुंकले होते. रोज 130 कोटी जनतेला माफी मागावी लागेल. रोज कोणी ना कोणी थुंकत असतात. मी सार्वजनिक ठिकाणी थुंकलो नाही. मी राजकीय नेत्यांवर थुंकलो नाही, बेईमानांची नावे घेतल्यावर थुंकलो. हा फरक आहे. 

 राऊत म्हणाले की, धरणांमध्ये मुतण्यापेक्षा थुंकणं चांगलं. तसेच ज्याचं जळतं त्याला कळते. आम्ही भोगतो आहोत. आम्ही सगळं भोगूनही जमिनीवर उभे आहोत. मी माझ्या पक्षाबरोबर ठामपणे उभा आहे. आमच्या मनात पक्ष बदलण्याचा आणि संकटं येत आहेत म्हणून भाजपासारख्या पक्षाबरोबर सूत जुळवण्याचा आमचा विचार होत नाही.