राघव जुयालने सांगितले चित्रपटात सलमान खानसोबत काम करण्याची संधी कशी मिळाली!

या वीकएंडला सोनी एन्टरटेन्मेंट टेलिव्हिजनवरील द कपिल शर्मा शोचा भाग धमाकेदार असणार आहे कारण सलमान खानची दमदार उपस्थिती या भागात असणार आहे. त्याच्या सोबत या हास्यजत्रेत सामील होणार आहेत ‘किसी का भाई किसी की जान’ या आगामी चित्रपटातील इतर कलाकार- पूजा हेगडे, शहनाज गिल, राघव जुयाल, पलक तिवारी, जस्सी गिल, सिद्धार्थ निगम, विनाली भटनागर आणि सुखबीर. हे सगळे कलाकार कपिलच्या अतरंगी परिवाराच्या धमाल अॅक्टला खूप हसून दाद देताना दिसतील, तसेच आपले काही खाजगी किस्से देखील शेअर करतील.

मनमोकळ्या गप्पा मारताना आपल्या स्लो-मोशन वॉकसाठी प्रसिद्ध असलेला डान्सिंग स्टार राघव जुयाल, आपल्याला किसी का भाई किसी की जान हा चित्रपट कसा मिळाला याचा किस्सा सांगताना दिसेल. तो म्हणाला, “मी एका दुसऱ्या प्रोजेक्टचे शूटिंग करत असताना माझ्या टीममधला एक माणूस धावत माझ्याकडे आला आणि त्याने मला सांगितले की, मला सलमान खानचा फोन आला आहे. मी शांतपणे त्याला सांगितले की ठीक आहे, मी मग फोन करीन, कारण मला वाटले की तो माझा डान्सर मित्र सलमान यूसुफ खानबद्दल बोलतोय (हसतो)! त्यावर तो माणूस म्हणाला की अरे मी द सलमान खानबद्दल बोलतोय. मला तर धक्काच बसला कारण सलमान कधी मला थेट फोन करेल असा मी स्वप्नातही विचार केला नव्हता. मी धावत फोनकडे गेलो. मला वाटले तो मला कोरिओग्राफीसाठी विचारेल पण त्याऐवजी हे ऐकून मला आश्चर्यच वाटले की, तो मला त्याच्या चित्रपटातील एक भूमिका देऊ करत होता. 2 मिनिटे तर मी गप्पच राहिलो. अशा प्रकारे मला सलमान खान अभिनीत चित्रपट मिळाला!”