मुंबई : सामाजिक, मनोरंजक  ‘मसुटा’ हा मराठी चित्रपट २४ फेब्रुवारी २०२३ रोजी संपूर्ण महाराष्ट्रात रिलीज होणार आहे. या चित्रपटाद्वारे मराठी रसिकांसमोर जगण्यासाठी धडपड करणारी जगावेगळी कर्मकहाणी आणि  समाजातील एका विशिष्ट वर्गातील मनाला भिडणारी एक आगळी वेगळी कथा येणार आहे. 

 

  काशिबाई फिल्म्स प्रोडक्शन आणि साईसागर प्रोडक्शनची निर्मिती असलेल्या ‘मसुटा’ या चित्रपटाची निर्मिती भरत मोरे आणि मनेश लोढा यांनी केली आहे. अजित देवळे आणि सुनील शिंदे या चित्रपटाचे असोसिएट प्रोड्युसर्स आहेत.  या चित्रपटाच्या माध्यमातून विविध सामाजिक संदेशही देण्यात आले आहेत. या चित्रपटानं आजवर देश-विदेशांतील बऱ्याच सिने महोत्सवांमध्ये आपला ठसा उमटवला आहे. 

 

याबाबत दिग्दर्शक देवळे म्हणाले की, ‘मसुटा’ हा जरी एका विशिष्ट वर्गातील कुटुंबाची कथा सांगणारा असला तरी परिपूर्ण मनोरंजक चित्रपट आहे. या आधुनिक जगापुढे आपल्या पारंपरिक व्यवसायामुळे आजही या म्हसणजोगी समाजाला किती यातना सहन कराव्या लागतात या इतर शिक्षीत समाजाला सांगण्याचा काहीसा धाडसी प्रयत्न लिखाणातून केला आहे. समस्त जगभरातील मानवजातीला देहदानाचा संदेश या चित्रपटाच्या अति मनोरंजक कथानकातून करून देणार आहे.

 

‘मसुटा’चं पटकथा लेखन भरत मोरे यांनी केलं असून, अनिल राऊत यांनी संवाद लिहिले आहेत. अनंत जोग, नागेश भोसले, हृदयनाथ राणे, रियाझ मुलाणी, अर्चना महादेव, वैशाली केंडाळे, कांचन पगारे, यश मोरे आदी कलाकारांनी या चित्रपटात अभिनय केला आहे.