विद्यार्थी वाहतूक करणाऱ्या स्कूल व्हॅनला आग

पुणे : पुण्यातील एका विद्यार्थ्यांची वाहतूक करणाऱ्या व्हॅनला आग लागून व्हॅनचे नुकसान झाल्याची घटना घडली. वारजे परिसरामध्ये शाळेच्या विद्यार्थ्यांची वाहतूक करणाऱ्या व्हॅनला अचानक आह लागली. मात्र सुदैवाने व्हॅनमध्ये विद्यार्थी नसल्याने होणारी जीवित हानी टळली. वारजे परिसरात असणाऱ्या कावेरी हॉटेल शेजारील लेनमधून स्कूल व्हॅन जात असताना व्हॅनच्या इंजिनने अचानक पेट घेतला.

आगीचे कारण अद्याप समजले नसले तरी वायरिंगमधील शॉर्टसर्किटमुळे आग लागली असण्याची शक्यता अग्निशमन दलाच्या जवानांनी वर्तविली. सतर्क स्थानिक नागरिकांनी ताबडतोब जवळील हॉटेलमधून पाणी घेऊन आग विझविण्याचा प्रयत्न केला. माहिती मिळताच काही वेळात अग्निशमन दल घटनास्थळी दाखल होऊन त्यांनी आग आटोक्यात आणली.