no images were found
सारंग देशमुख यांच्या सोबतीने महायुती मजबूत – चंद्रकांतदादा पाटील : पदवीधर आणि शिक्षक मतदारसंघांत महायुतीचेच उमेदवार विजयी होतील – सारंग देशमुख : चंद्रकांतदादा पाटील यांचा वसंतराव देशमुख हायस्कूलमधील शिक्षकांशी संवाद
कोल्हापूर : सारंग देशमुख यांच्यासारखे नेतृत्व महायुतीसोबत आल्याने महायुती अधिक मजबूत झाली आहे, अशी भावना राज्याचे उच्च व तंत्रशिक्षणमंत्री चंद्रकांतदादा पाटील यांनी व्यक्त केली. पुणे पदवीधर आणि शिक्षक मतदारसंघांच्या निवडणुकीत महायुतीचेच उमेदवार विजयी होतील, असा विश्वास शिवसेनेचे गटनेते व नगरसेवक सारंगधर देशमुख यांनी व्यक्त केला.
पुणे विभागीय पदवीधर आणि शिक्षक मतदारसंघांच्या निवडणूक प्रचाराच्या निमित्ताने चंद्रकांतदादा पाटील यांनी कोल्हापुरातील श्री लक्ष्मी शिक्षण प्रसारक मंडळ संचालित श्री वसंतराव जयंतराव देशमुख हायस्कूलला भेट दिली. यावेळी त्यांनी शिक्षकांशी संवाद साधला.
या वेळी व्यासपीठावर शिवसेनेचे गटनेते व नगरसेवक सारंगधर देशमुख, संस्थेच्या अध्यक्षा सुमन देशमुख, राहुल चिकोडे यांच्यासह संस्थेचे पदाधिकारी आणि शिक्षक मोठ्या संख्येने उपस्थित होते.
चंद्रकांतदादा पाटील म्हणाले, “स्वर्गीय वसंतराव देशमुख यांच्याशी माझे जुने स्नेहाचे संबंध होते. पदवीधर मतदारसंघाचे नेतृत्व करत असताना विविध विषयांवर त्यांच्याशी अनेकदा संवाद व्हायचा. महायुती सरकारच्या काळात पदवीधर आणि शिक्षकांचे अनेक प्रश्न मार्गी लावण्यात यश आले आहे.”
ते पुढे म्हणाले की, महापालिका निवडणुकीपासून सारंग देशमुख यांच्यासारखे नेतृत्व महायुतीसोबत आल्याने युतीला अधिक बळ मिळाले आहे. पुणे पदवीधर मतदारसंघातून डॉ. स्मिता जाधव, तर शिक्षक मतदारसंघातून कौस्तुभ गावडे हे भाजप-महायुतीचे उमेदवार निवडणूक लढवत आहेत. ही निवडणूक प्राधान्यक्रम पद्धतीने होत असल्याने दोन्ही उमेदवारांना मोठ्या मताधिक्याने विजयी करण्याचे आवाहन त्यांनी उपस्थित शिक्षकांना केले.
संस्थेचे सचिव आणि शिवसेनेचे गटनेते व नगरसेवक सारंग देशमुख म्हणाले की, संस्थेला अडचणीच्या काळात चंद्रकांतदादांनी नेहमीच मदत केली आहे. त्यामुळे या निवडणुकीत महायुतीच्या उमेदवारांच्या विजयासाठी संस्थेतील प्रत्येक व्यक्ती प्रयत्न करेल, असा विश्वास त्यांनी व्यक्त केला.
