रंकाळ्याच्या पाण्याच्या गुणवत्तेसाठी नऊ कोटींचे कॉऊनॉमिक्स तंत्रज्ञान, चार टप्प्यात होणार काम

Oplus_131072

रंकाळ्याच्या पाण्याच्या गुणवत्तेसाठी नऊ कोटींचे कॉऊनॉमिक्स तंत्रज्ञान, चार टप्प्यात होणार काम
कोल्हापूर : रंकाळा तलावातील पाण्याची गुणवत्ता आणि स्थानिक परिसर सुधारण्यासाठी तलावाच्या जलक्षेत्रामध्ये काऊनॉमिक्स या पेटंट तंत्रज्ञानाच्या माध्यमातून एक वर्षाच्या कालावधीसाठी ९ कोटी २४ लाख रुपये खर्चून स्थानिक परिसंस्थेचे पुनरुत्थान, पुनर्स्थापना व पुनरुज्जीवन करण्याचा महानगरपालिका प्रशासनाचा प्रयत्न असल्याची माहिती जलअभियंता हर्षजित घाटगे यांनी पत्रकाद्वारे दिली आहे.तलावातील पाण्याची गुणवत्ता सुधारण्यासोबतच तलाव व त्याच्या पाणलोट क्षेत्रातील प्रदूषण नियंत्रण आणि पर्यावरण संवर्धनाच्या उपाययोजना करण्यात येणार असून या उपाययोजनांमुळे तलावाचे संवर्धन, पर्यावरणीय आरोग्य सुधारणा तसेच तलावाची नैसर्गिक परिसंस्था जतन करण्यास मदत होणार आहे.या प्रक्रियेची सुरुवात तलावाच्या जलस्रोताचा अभ्यास व स्थळ पाहणी करून करण्यात येणार आहे. त्यानंतर संशोधन पथकाकडून उपचारासाठी आवश्यक वनस्पतीजन्य अर्काची तयारी केली जाईल. प्रस्तावानुसार हे औषध १०० टक्के वनस्पतीजन्य अर्कापासून तयार केले जाणार असून, स्थानिक कृषी-हवामान क्षेत्रातील निवडक वनस्पतींच्या समूहातून ते तयार केले जाते.पुनरुज्जीवन, पुनर्स्थापना, पुनरुत्थान अशा चार टप्प्यात हे काम होणार आहे. या संपूर्ण एक वर्षाच्या कालावधीत तलावातील पाणी, गाळ आणि हवेच्या गुणवत्तेचे नियमित परीक्षण करण्यात येणार असून, त्याआधारे उपचार प्रक्रियेचा परिणाम व तलावाच्या पर्यावरणीय स्थितीचा आढावा घेतला जाणार आहे. रंकाळा तलावाचे जलसंवर्धन, नागरिकांची सुरक्षितता आणि स्थानिक जैवविविधतेचे संरक्षण या तिन्ही बाबींचा समतोल साधत तलावाचा दीर्घकालीन पर्यावरणपूरक विकास करण्याचा महापालिकेचा प्रयत्न आहे..  काऊनॉमिक्स तंत्रज्ञान म्हणजे काय?…हे वेदिक विज्ञान आणि निसर्गावर आधारित एक आयुर्वेदिक तंत्रज्ञान आहे. गाईपासून मिळणाऱ्या घटकांवर आधारित नैसर्गिक सूक्ष्मजीव आणि आयुर्वेदिक द्रव्यांद्वारे पाण्यातली घाण साफ केली जाते. यामुळे पाण्यातील दुर्गंधी नाहीशी होते. शेवाळ विघटित होते. ऑक्सिजनचे प्रमाण वाढते. मासे किंवा तत्सम जलचरांना धोका नाही.
– रंकाळा तलावाची निर्मिती – सन १८८३- तलावाची परिघ लांबी सुमारे ६ कि.मी.- सरासरी खोली साडेचार मीटर- पाणी साठवण क्षमता अंदाजे ४७ लाख घनमीटर- रंकाळा तलाव १०७ हेक्टर क्षेत्रफळावर विस्तारलेला
कोणत्या कामावर किती खर्च होणार – रंकाळा काठावर एसटीपी बांधणे व ड्रेनेज लाइन टाकणे – ११ कोटी ९९ लाख- काऊनॉमिक्स तंत्रज्ञानाचा वापर करून रंकाळा स्वच्छ करणे – ९ कोटी २४ लाख