तृतीयपंथी कल्याण, हक्क व संरक्षण कायदा’ विषयावर गुरूवारी कार्यशाळा

Oplus_131072

‘तृतीयपंथी कल्याण, हक्क व संरक्षण कायदा’ विषयावर गुरूवारी कार्यशाळा
कोल्हापूर, : महाराष्ट्र शासनाचे सहायक आयुक्त, समाजकल्याण कार्यालय, कोल्हापूर आणि शिवाजी विद्यापीठाचे सामाजिक समावेशन अभ्यास केंद्र यांच्या संयुक्त विद्यमाने ‘तृतीयपंथी कल्याण, हक्क व संरक्षण कायदा २०१९ व सुधारित नियम २०२०’ या विषयावर येत्या गुरुवारी, दि. २७ ऑगस्ट २०२६ रोजी सकाळी १० वाजता विद्यापीठाच्या मानव्यशास्त्र सभागृहात एकदिवसीय कार्यशाळेचे आयोजन करण्यात आले आहे. कोल्हापूरचे जिल्हाधिकारी डॉ. विजय राठोड यांच्या हस्ते कार्यशाळेचे उद्घाटन होणार असून कार्यक्रमाच्या अध्यक्षस्थानी कुलगुरू डॉ. राजनीश कामत असतील.
कार्यशाळेच्या उद्घाटनप्रसंगी प्रमुख पाहुणे म्हणून कोल्हापूर जिल्ह्याचे पोलीस अधीक्षक श्री. नीलोत्पल, प्र-कुलगुरू डॉ. ज्योती जाधव, कुलसचिव डॉ. विलास शिंदे, सहायक आयुक्त (समाजकल्याण) सचिन साळे, समाजकल्याण अधिकारी अक्षय कुरणे, सचिन परब आदी उपस्थित राहणार आहेत.
कार्यशाळेच्या पहिल्या सत्रात ‘तृतीयपंथी समजून घेताना’ या विषयावर तृतीयपंथी हक्क व तक्रार निवारण जिल्हास्तरीय समिती, कोल्हापूरच्या सदस्य शिवानी गजबर, तर दुसऱ्या सत्रात ‘तृतीयपंथी कायदे व धोरणाबाबत सामाजिक जनजागृती’ या विषयावर सामाजिक समावेशन अभ्यास केंद्राचे अविनाश भाले मार्गदर्शन करतील.
तृतीयपंथीय समुदायाच्या सामाजिक समावेशनासाठी केवळ कायदे करणे पुरेसे नसून त्याबाबत समाजात जागृती निर्माण करणे, शासकीय यंत्रणांना संवेदनशील करणे आणि उपलब्ध हक्क व संरक्षणाच्या तरतुदींची प्रभावी अंमलबजावणी करणे गरजेचे आहे. या अनुषंगाने कार्यशाळेत कायदे, धोरणे, सामाजिक वास्तव आणि तृतीयपंथीयांच्या हक्कांशी संबंधित विविध बाबींवर सविस्तर चर्चा होणार आहे. कार्यशाळेच्या माध्यमातून प्राध्यापक,विद्यार्थी, शासकीय अधिकारी, सामाजिक कार्यकर्ते आणि संबंधित घटकांमध्ये तृतीयपंथीयांच्या हक्कांविषयी संवेदनशीलता व कायदेशीर जाणीव निर्माण होण्यास मदत होणार आहे. तरी या कार्यशाळेत संबंधितांनी सहभागी व्हावे, असे आवाहन सामाजिक समावेशन अभ्यास केंद्राचे संचालक डॉ. मुरलीधर भानारकर यांनी केले आहे.