no images were found
एकल महिलांची नोंदणी करण्यासाठी महापालिकेचे सर्वेक्षण सुरू
कोल्हापूर, : राज्य शासनाच्या महिला व बाल विकास विभागाच्या दि. 22 मे 2026 रोजीच्या शासन निर्णयानुसार राज्यातील एकल महिला धोरणाचा मसुदा तयार करण्यासाठी एकल महिला मसुदा समिती गठीत करण्यात आली आहे. या पार्श्वभूमीवर एकल महिलांच्या सक्षमीकरणासाठी त्यांच्या संख्येसह आवश्यक माहिती संकलित करणे गरजेचे असल्याने नगर विकास विभागाने सर्व महानगरपालिका, नगरपरिषदा व नगरपंचायतींना आपल्या कार्यक्षेत्रातील एकल महिलांचे सर्वेक्षण करून नोंदणी व अद्ययावत माहिती संकलित करण्याच्या सूचना दिल्या आहेत.
त्यानुसार कोल्हापूर महानगरपालिका कार्यक्षेत्रातील निरक्षर, अल्पशिक्षित, कष्टकरी व पात्र एकल महिला नोंदणी प्रक्रियेपासून वंचित राहू नयेत यासाठी महानगरपालिकेच्या वतीने अशा महिलांच्या नोंदणीचे काम सुरू करण्यात आले आहे. यामध्ये विधवा, परित्यक्त्या, घटस्फोटित व अविवाहित महिलांची नोंदणी करण्यात येणार आहे.
या सर्वेक्षणाची जबाबदारी महानगरपालिकेच्या कर आकारणी व वसुली विभागातील कर्मचाऱ्यांवर सोपविण्यात आली आहे. कर्मचारी शहरातील संबंधित महिलांची माहिती विहित नमुन्यातील अर्जाद्वारे संकलित करून नोंदणी प्रक्रिया पूर्ण करणार आहेत.
तरी शहरातील नागरिकांनी आपल्या परिसरात सर्वेक्षणासाठी येणाऱ्या महानगरपालिका कर्मचाऱ्यांना सहकार्य करावे. पात्र एकल महिलांनी विहित नमुन्यातील फॉर्म भरून आवश्यक माहिती देत नोंदणी करून घ्यावी असे आवाहन कोल्हापूर महानगरपालिकेच्या वतीने करण्यात आले आहे.
