no images were found
जागतिक अनिश्चिततेच्या पार्श्वभूमीवर आरबीआय चा ‘वेट अँड वॉच’ दृष्टिकोन, धोरण दर कायम
जागतिक भू-राजकीय अनिश्चिततेच्या पार्श्वभूमीवर रिझर्व्ह बँक ऑफ इंडिया (आरबीआय) ने आपल्या ताज्या पतधोरणात दर आणि धोरणात्मक भूमिका कायम ठेवत सावध पण संतुलित भूमिका घेतली आहे.एचडीएफसी बँकेच्या प्रिन्सिपल इकॉनॉमिस्ट साक्षी गुप्ता यांच्या मते,आरबीआयने प्रतिक्रिया देण्याऐवजी संयम राखत ‘वेट अँड वॉच’ दृष्टिकोन स्वीकारला असून, धोरणाच्या एकूण भूमिकेत कोणताही आक्रमक संकेत दिसत नाही. त्यांनी नमूद केले की, अपेक्षेप्रमाणे कोणतेही असामान्य किंवा वेगळे निर्णय जाहीर करण्यात आले नाहीत.आरबीआयने महागाईवरील वाढत्या जोखमींची दखल घेत आर्थिक वर्ष27 साठीचा अंदाज वाढवला आहे, ज्यामागे प्रामुख्याने ऊर्जा खर्चातील वाढ कारणीभूत आहे, तर वाढीबाबत सावध भूमिका कायम ठेवली आहे. मात्र,साक्षी गुप्ता यांनी स्पष्ट केले की, पश्चिम आशियातील तणावापूर्वी भारतीय अर्थव्यवस्थेची मजबूत पायाभूत स्थिती ही सध्याच्या बाह्य धक्क्यांना तोंड देण्याची क्षमता वाढवते. तसेच, महागाईची सुरुवातीची पातळी अनुकूल असल्यामुळे ती आर्थिक वर्ष27 मध्ये आरबीआय च्या लक्ष्य मर्यादेत राहण्याची शक्यता असल्याचे त्यांनी सांगितले.
चलन आणि बाजाराच्या दृष्टीकोनाबाबत साक्षी गुप्ता यांनी सांगितले की, रुपयातील अतिशय चढ-उतार नियंत्रित करण्याबाबत आरबीआय आत्मविश्वासपूर्ण असून, विशिष्ट स्तर लक्ष्य करण्याचे धोरण नाही. त्यांनी आर्थिक वर्ष27 साठी महागाईचा अंदाज 4.9% आणि आर्थिक वाढ 6.8–7% दरम्यान राहण्याचा अंदाज व्यक्त केला आहे, बशर्ते सध्याचा भू-राजकीय तणाव अल्पकालीन राहील. या पार्श्वभूमीवर धोरण दर आर्थिक वर्ष27 दरम्यान अपरिवर्तित राहण्याची शक्यता असून, रुपया स्थिर होण्याची आणि 10 वर्षांच्या रोख्यांच्या उत्पन्नात 6.8–7% दरम्यान स्थिरता येण्याची अपेक्षा आहे.
