कुरुंदवाड मध्ये लोकायत चषक बुद्धिबळ स्पर्धा प्रारंभ…आदित्य, अर्णव, अभय, दिशा, अथर्व, वरद,अवनीश व अधिराज आघाडीवर.     

Oplus_131072

कुरुंदवाड मध्ये लोकायत चषक बुद्धिबळ स्पर्धा प्रारंभ…आदित्य, अर्णव, अभय, दिशा, अथर्व, वरद,अवनीश व अधिराज आघाडीवर.                                          कुरुंदवाड :- जैन सांस्कृतिक भवन कुरुंदवाड येथे कुरुंदवाड चेस अकॅडमीने पहिल्यांदाच आयोजित केलेल्या लोकायत चषक खुल्या व वयोगटातील बुद्धिबळ स्पर्धा मोठ्या उत्साहात प्रारंभ झाल्या.. या स्पर्धेचे उद्घाटन श्री दत्त शेतकरी सहकारी साखर कारखान्याच्या माजी व्हाईस चेअरमन श्रीमती विनया घोरपडे व सौ.स्मिता आलासे यांच्या हस्ते बुद्धिबळाच्या पटावर चाल करून करण्यात आले…यावेळी व्यासपीठावर महाराष्ट्र बुद्धिबळ संघटनेचे खजिनदार व आंतरराष्ट्रीय पंच भरत चौगुले, चेस असोसिएशन कोल्हापूरचे सचिव व या स्पर्धेचे मुख्य पंच मनीष मारुलकर , लोकयत कोल्हापूरचे आर्.एस्. आलासे, कुरुंदवाड चेस अकॅडमीचे विनायक बिडकर, सच्चिदानंद आवटी, अविनाश बिडकर, रसूल पट्टेकरी, प्रशांत धनवडे व मनोज कुलकर्णी उपस्थित होते. मुंबई,ठाणे,पुणे, सातारा, सिंधुदुर्ग, सांगली, बेळगाव, रायबाग व स्थानिक कोल्हापूर इचलकरंजी, जयसिंगपूर, गडहिंग्लज, कागल, राधानगरी, वारणानगर येथील नामवंत 192 बुद्धिबळपटू या स्पर्धेत उत्स्फूर्तपणे सहभागी झाले आहेत…यापैकी 55 बुद्धिबळपटू आंतरराष्ट्रीय गुणांकन प्राप्त आहेत…
खुल्या गट सतरा वर्षाखालील गट व अकरा वर्षाखालील गट अशा तीन स्वतंत्र गटात आयोजित केलेल्या या बुद्धिबळ स्पर्धा स्विस लिग पद्धतीने एकूण सात फेऱ्यात होणार आहेत..आज झालेल्या स्पर्धेच्या चौथ्या फेरीनंतर खुल्या गटात द्वितीय मानांकित कोल्हापूरचा आदित्य सावळकर चार गुणासह आघाडीवर आहे. अग्रमानांकित रेंदाळचा श्रीराज भोसले, तृतीय मानांकित जयसिंगपूरची दिव्या पाटील व बिगरमानांकित बत्तीसशिराळ चे प्रदीप कुमार नलवडे हे चौघेजण साडेतीन गुणासह संयुक्तपणे द्वितीय स्थानावर आहेत.सतरा वर्षाखालील गटात अग्रमानांकित सांगलीचा आदित्य चव्हाण, तृतीय मानांकित ठाण्याचा आदित्य कदम, चौथा मानांकित जांभळी चा अभय भोसले व चौथी मानांकित जयसिंगपूरचे दिशा पाटील हे चौघेजण चार गुणासह संयुक्तपणे आघाडीवर आहेत.अकरा वर्षाखालील गटात अग्रमानांकित मिरजेचा वरद पाटील व सातवा मानांकित वारणानगरचा अधिराज डोईजड हे तिघेजण चार गुणासह संयुक्तपणे आघाडीवर आहेत तर तृतीय मानांकित सांगलीचा पृथ्वीराज पाटील साडेतीन गुणासह द्वितीय स्थानावर आहे.