no images were found
शिवजयंती निमित्त पन्हाळा गडावर ‘मेगा पदयात्रा’ आणि दोन दिवसीय रक्तदान शिबिराचे आयोजन
कोल्हापूर, : भारतीय स्वातंत्र्याच्या अमृत महोत्सवी वर्षाचे औचित्य साधून, छत्रपती शिवाजी महाराज जयंती निमित्त दिनांक १९ फेब्रुवारी २०२६ रोजी किल्ले पन्हाळा येथे भव्य ‘मेगा पदयात्रा’ (My Bharat – Mera Yuva Bharat) आयोजित करण्यात आली आहे. भारत सरकारच्या युवा कार्यक्रम व क्रीडा मंत्रालयाच्या मार्गदर्शनानुसार कोल्हापूर जिल्हा प्रशासनाच्या वतीने या कार्यक्रमाचे नियोजन करण्यात आले असून, जिल्हाधिकारी अमोल येडगे यांनी जिल्ह्यातील युवक, विद्यार्थी आणि नागरिकांनी उत्स्फूर्तपणे सहभागी होण्यासाठी आवाहन केले आहे.
ही ‘मेगा पदयात्रा’ १९ फेब्रुवारी रोजी सकाळी ०८.३० वाजता पन्हाळा नगरपालिकेजवळील छत्रपती शिवाजी महाराज मंदिरापासून सुरू होईल आणि मयुर बागेपर्यंत काढली जाईल. या पदयात्रेत शासकीय व निमशासकीय कर्मचाऱ्यांसह सुमारे २००० विद्यार्थी सहभागी होणार आहेत. केवळ पदयात्राच नव्हे, तर सामाजिक बांधिलकी जपत दिनांक १८ आणि १९ फेब्रुवारी असे दोन दिवस रक्तदान शिबिराचेही आयोजन करण्यात आले आहे.
या संपूर्ण कार्यक्रमाच्या यशस्वी नियोजनासाठी पन्हाळ्याचे उपविभागीय अधिकारी श्री. समीर शिंगटे यांची समन्वय अधिकारी म्हणून नियुक्ती करण्यात आली आहे. पन्हाळा तहसीलदार यांच्या माध्यमातूनही आवश्यक ती पूर्वतयारी पूर्ण करण्यात आली आहे.
जिल्हा प्रशासनाच्या वतीने या ‘मेगा पदयात्रेत’ आणि ‘रक्तदान शिबिरात’ जास्तीत जास्त युवक, विद्यार्थी आणि नागरिकांनी उत्स्फूर्तपणे सहभागी होऊन शिवजयंतीचा उत्साह द्विगुणित करावा, असे आवाहन करण्यात येत आहे.
