no images were found
सुप्रसिद्ध अभिनेता आदिनाथ कोठारेची मालिका विश्वात दमदार एण्ट्री : स्टार प्रवाहच्या नशीबवान मालिकेच्या निमित्ताने पहिल्यांदाच दिसणार दैनंदिन मालिकेत
सुप्रसिद्ध अभिनेता आणि निर्माता आदिनाथ कोठारेला आपण अनेक सिनेमा आणि वेबसीरिजच्या माध्यमातून भेटतच असतो. आदिनाथ आता मालिका विश्वात दमदार एण्ट्री घेण्यासाठी सज्ज झाला आहे. स्टार प्रवाहच्या नशीबवान मालिकेतून रुद्रप्रताप घोरपडेच्या रुपात आदिनाथ प्रेक्षकांच्या भेटीस येणार आहे. रुद्रप्रताप घोरपडे हा नागेश्वर घोरपडेचा एकुलता एक मुलगा. दिसायला रुबाबदार.. जणू एखादा राजकुमार. स्वभावाने मनमिमळावू, सर्वांची मदत करणारा रुद्रप्रताप नागेश्वरच्या स्वभावाच्या एकदम विरुद्ध आहे. वडिलांचा मोठा बिझनेस असल्याने रुद्रला परदेशी पाठवण्याची त्याच्या वडिलांची म्हणजेच नागेश्वरची इच्छा होती. पण रुद्रने गावात राहून गावातल्या लोकांच्या मदतीसाठी आणि सेवेसाठी आपलं आयुष्य वाहून घेण्याचा निर्णय घेतला.
आदिनाथ कोठारेसाठी रुद्रपताप ही भूमिका ड्रीमरोल आहे. या भूमिकेविषयी सांगताना आदिनाथ म्हणाला, या मालिकेसाठी मी प्रचंड उत्सुक आहे. माझी पहिली दैनंदिन मालिका आहे. गेली अनेक वर्ष मालिका करण्याचा विचार सुरु होता. नशिबाने नशीबवान मालिकेच्या निमित्तानेच हा योग जुळून आला. टीव्ही हे फक्त माझंच नाही तर प्रत्येकाचच आवडतं माध्यम आहे. मालिकेच्या माध्यमातून तुम्ही घराघरात पोहोचता, प्रेक्षकांच्या कुटुंबाचा भाग होता. नशीबवान मालिकेची गोष्ट अतिशय सुंदररित्या गुंफण्यात आलीय. रुद्रप्रताप या भूमिकेला देखिल अनेक पदर आहेत जे हळू हळू उलगडतील. स्टार प्रवाह वाहिनी सोबत खूप जुनं नातं आहे. निर्माता म्हणून कोठारे व्हिजनची पहिली मालिका स्टार प्रवाहसोबत केली होती. त्यानंतर अनेक सुपरहिट मालिका स्टार प्रवाहसोबत केल्या. पुन्हा एकदा नव्या प्रोजेक्टची सुरुवात महाराष्ट्राच्या नंबर वन वाहिनीसोबत होतेय याचा अतिशय आनंद आहे. मालिकेत दिग्गज कलाकारांची फौज आहे. गणेशोत्सवाच्या धामधुमीत अतिशय छान कलाकृती माझ्या वाट्याला आलीय. मला खात्री आहे बाप्पाच्याच आशीर्वादाने नशीबवान मालिका देखिल प्रेक्षकांच्या मनात नक्कीच घर करेल. तेव्हा नक्की पाहा आमची नवी मालिका नशीबवान १५ सप्टेंबरपासून रात्री ९ वाजता फक्त स्टार प्रवाहवर.
