३० ऑगस्टला प्रदर्शित होणाऱ्या नेता-गीता चित्रपटाचा धमाकेदार ट्रेलर लाँच

कॉलेजमधलं राजकारणाचा मसाला आणि त्याला असलेला प्रेमाचा तडका “नेता गीता” या चित्रपटातून अनुभवायला मिळणार आहे. ३० ऑगस्टला प्रदर्शित होणाऱ्या या चित्रपटाचा ट्रेलर लाँच करण्यात आला असून, पुरेपूर मनोरंजन करणारा हा चित्रपट असल्याचा अंदाज ट्रेलरवरून बांधता येतो.

सिम्बारिया फिल्म्सतर्फे “नेता गीता” या चित्रपटाची प्रस्तुती करण्यात येत आहे.  सुधांशु बुडूख यांनी चित्रपटाचं लेखन आणि दिग्दर्शन केलं आहे. चित्रपटात शिवानी बावकर, सुधांशु बुडूख, रोहित कोकाटे, अनिल नगरकर, विठ्ठल काळे, अजय तपकिरे, विराज अवचिते, सुहास जोशी असे उत्तमोत्तम कलाकार या चित्रपटात आहेत. रोशन मारोडकर यांनी छायांकन, निरंजन पेडगावकर यांनी संगीत, सौमित्र धारासूरकर यांनी संकलन, तर संजीव हवालदार, धीरज भालेराव यांनी नृत्य दिग्दर्शनाची जबाबदारी निभावली आहे. 

“नेता गीता” या चित्रपटात कॉलेज काळातल्या निवडणुका, त्या वेळचं प्रेम यांची मनोरंजक मांडणी करण्यात आली आहे. त्यामुळे राजकारण आणि प्रेम हे चित्रपटाचं मुख्य कथासूत्र आहे. एका तरुणाच्या आयुष्यात एक तरुणी येते आणि त्याचं आयुष्य कसं बदलतं हे या चित्रपटातून पाहता येणार आहे. युथफुल कल्पनेवरील या चित्रपटातील चार श्रवणीय गाणी असल्यानं संगीताचाही आनंद मिळणार आहे. फ्रेश नायक नायिका, वेगळ्या पद्धतीची मांडणी असलेलं कथानक, कसदार अभिनेते या चित्रपटात आहेत. चित्रपटाच्या ट्रेलरमुळे चित्रपटाविषयी उत्सुकता वाढली आहे. चित्रपट मोठ्या पडद्यावर पाहण्यासाठी आता ३० ऑगस्टपर्यंतच वाट पहावी लागणार आहे.