सोनी सबवरील ‘वंशज’ मालिकेत अवघड प्रश्नांना सामोरी जाणार युक्ती, आणि डीजेचा संशय बळावणार

सोनी सबवरील ‘वंशज’ मालिकेत युविका महाजन (अंजली तत्रारी)ची गोष्ट सांगितली आहे. युविका वारस म्हणून गुणवत्तेच्या आधारे कुटुंबाच्या व्यवसायावर दावा करते आणि लैंगिक आधारावर हा वारसा मुलाला प्राप्त होण्याच्या पारंपरिक मान्यतेला शह देते. यामुळे महाजन कुटुंबात तणाव निर्माण होतो आणि युविका आणि डीजे (माहिर पांधी) यांच्यात तीव्र चढाओढ सुरू होते. अलीकडच्या भागांमध्ये युक्तीची (वेगळ्या रूपातील युविका) आई भूमी (गुरदीप कोहली) युक्तीला तिची विवेकबुद्धी जागी करण्याचे आवाहन करते त्यामुळे युक्ती डीजेची प्रेयसी कोयल (निशा नागपाल) हिच्या भूतकाळाचे काही पुरावे डीजेच्या आईकडे म्हणजे गार्गीकडे (परिणिता सेठ) पोहोचण्यापूर्वी परत करण्याचे ठरवते.

पुढील भागांमध्ये महाजन कुटुंबीय जेवणासाठी युक्तीला आमंत्रित करतात. पण, प्रत्येकजण तिच्याकडे संशयाच्या नजरेतून बघत असतो. आणि तिच्यावर प्रश्नांचा भडिमार करतो. तिची ओळख, सोशल मीडियावरची तिची उपस्थिती आणि संबंध यावरून तिला अनेक प्रश्न विचारले जातात. डीजेला होळीचे एक जुने फुटेज मिळते, ज्यामध्ये एक तपकिरी डोळ्यांची युक्तीसारखी दिसणारी मुलगी असते. यावरून त्याच्या मनात संशय येतो की, दादाबाबूंना (पुनीत इस्सार) सोडवण्याचा प्रयत्न करण्यात तिचाच हात असावा. पण, युक्ती स्वतःच्या बचावात सांगते की, तिच्या डोळ्यांचा रंग व्हिडिओमधल्या मुलीच्या डोळ्यांच्या रंगापेक्षा वेगळा आहे. ती कदाचित युविका असेल असे ती सुचवते. दादाबाबूंसोबत अॅम्ब्युलन्समध्ये कोण होते याचे रहस्य उलगडता न आल्यामुळे डीजे वैतागतो. युक्तीला पकडण्यासाठी तो ते दृश्य रिक्रिएट करतो पण अपयशी ठरतो. युक्तीच्या डोळ्यांची तपासणी करण्यासाठी तो फॉरेन्सिक टीमला बोलावण्याचे ठरवतो.

डीजेच्या संशयी नजरेतून युक्ती वाचेल का?

युक्ती मुलतानीची भूमिका करत असलेली अंजली तत्रारी म्हणते, “युक्तीच्या मनात भावनांचा कल्लोळ माजला आहे, कारण तिची आई भूमी तिला सदसद्विवेकबुद्धी सोडल्याबद्दल ठपका देत आहे तर दुसरीकडे आपल्या ओळखीबद्दल ती डीजे आणि समस्त महाजन परिवाराच्या मनातील तिच्याविषयीच्या संशयाचा सामना करत आहे. दादाबाबूंना अॅम्ब्युलन्समधून घेऊन जाणारी व्यक्ती खरी कोण होती हे शोधण्यासाठी डीजे एकापाठोपाठ अनेक सापळे रचत आहे. पण, युक्तीचा निर्धार देखील तितकाच ठाम आहे. काहीही झाले तरी डीजेला आपल्यावर कुरघोडी करण्याची संधी ती देणार नाही. पुढील भागांमध्ये प्रेक्षक बघतील की, डीजेने रचलेल्या सापळ्यांमधून युक्ती कसा मार्ग काढते.”

 डीजे महाजनची भूमिका करत असलेला माहिर पांधी म्हणतो, “CCTV फुटेज मध्ये दिसलेला खरा गुन्हेगार शोधता न आल्यामुळे डीजे त्रासला आहे. ती युक्तीच आहे असे त्याला वाटते आहे, पण आपल्या विचारांना पुष्टी देणारा एकही पुरावा त्याच्याकडे नाहीये. त्यामुळे तो फारच वैतागला आहे. डीजेसाठी त्याची प्रतिमा, व्यवसायातील सत्ता आणि त्याची आई या गोष्टी सर्वाधिक महत्त्वाच्या आहेत. या गोष्टींना कुणीही धक्का लावलेला तो कधीच खपवून घेणार नाही.”