no images were found
बिबट्याची शाळेत हजेरी ; विद्यार्थी मात्र घरी
पुणे : शाळेत बिबट्या हजेरी लावल्याने मुलांच्या जीवाला धोका नको म्हणून त्यामुळे शाळा प्रशासनाने मुलांना शाळेतून घरी पाठवले. जुन्नर तालुक्यातील नारायणगाव येथील वारुळवाडीतील सबनीस शाळेच्या परिसरात बिबट्या ठाण मांडून बसला होता. या घटनेने परिसरात एकच खळबळ उडाली होती. वनविभाग आणि रेस्क्यू टीमने चार तासांच्या अथक प्रयत्नानंतर बिबट्याला सापळा रचून पकडले आणि सर्वांनी सुटकेचा निःश्वास सोडला.
मंगळवारी दुपारी दीडच्या सुमारास नारायणगाव येथील रा. प. सबनीस शाळेच्या आवारामध्ये मुलींच्या वसतिगृहासमोर बिबट्या ठाण मांडून बसल्याचे आढळल्याने शालेय विद्यार्थी, तसेच नागरिकांमध्ये भीतीचे वातावरण पसरले. भरवस्तीत बिबट्या आल्याने सर्वांचीच तारांबळ उडाली होती. या घटनेबाबत वनविभाग आणि रस्क्यू टीमला माहिती देण्यात आली. चार तासांच्या अथक प्रयत्नानंतर बिबट्याला सापळा रचून पकडण्यात आले आणि सर्वांनी सुटकेचा निःश्वास सोडला. हा बिबट्या साधारण एक वर्ष वयाचा असल्याचे वनक्षेत्रपाल अजित शिंदे यांनी सांगितले.
वारुळवाडी येथील भर वस्तीत असणाऱ्या रा. प. सबनीस विद्यामंदिर या शाळेत सुमारे साडेपाच ते सहा हजार विद्यार्थी रोज शिक्षण घेत आहेत. या शाळेत अगदी हाकेच्या अंतरावर शाळेजवळ बिबट्या लिंबाच्या झाडाखाली ठाण मांडून बसल्याचे आढळून आला. शालेय प्रशासनाने खबरदारीचा उपाय म्हणून तत्काळ विद्यार्थ्यांना घरी पाठविण्यात आले. वनरक्षक व रेस्क्यू टीमच्या सदस्यांनी तत्काळ घटनास्थळी येऊन बिबट्या पकडण्यासाठी प्रयत्न केले. सुमारे चार तासांच्या अथक परिश्रमानंतर सायंकाळी ६ वाजता बिबट्याला रेस्क्यू टीमच्या सदस्यांनी जेरबंद केले.
या घटनेने बिबट्या आता मानवी वस्तीत मोठ्या प्रमाणावर वावर करू लागला असून मानवी जीव धोक्यात येण्याची स्थिती आता निर्माण झाली आहे. याबाबत उपाय योजना करणे गरजेचे असल्याचे नागरिकांकडून सांगण्यात आले.
