गदर 2 चित्रपटात पुन्हा सकीनाची भूमिका साकारत असलेली अमीषा पटेल म्हणाली 

या रविवारी सोनी एन्टरटेन्मेंट टेलिव्हिजनवरील द कपिल शर्मा शो सगळ्यात लाडक्या कॉमेडी शोचा भाग धमाकेदार नसेल तरच नवल, कारण निरंतर हास्यविनोद, कॉमेडी आणि खदखदून हसवणाऱ्या अॅक्ट्सबरोबरच या भागात सनी देओल आणि अमीषा पटेल यांची उपस्थिती या कार्यक्रमाला चार चाँद लावणार आहे. हे कलाकार आपल्या गदर 2 चित्रपटाच्या प्रमोशनसाठी येणार आहेत. होस्ट कपिल शर्मा आणि त्याचा अतरंगी परिवार आपल्या गंमतीदार चाळ्यांनी आमंत्रित पाहुण्यांना भरपूर हसवतील आणि ही संध्याकाळ चिरस्मरणीय करतील.

 ‘गदर: एक प्रेम कथा’ या अजरामर प्रेम कहाणीत सनी देओल आणि अमीषा पटेल यांनी अनुक्रमे तारा सिंह आणि सकीना ही पात्रे रंगवली होती. ही जोडी सगळ्यांना खूप आवडली होती. सकीनाने प्रेक्षकांचे हृदय जिंकून घेतले होते. पुन्हा एकदा ही भूमिका करत असल्याबद्दल अमीषा पटेल म्हणते, “गदरमधल्या सकीना या व्यक्तिरेखेने माझ्या मनावर इतका ठळक ठसा उमटवला आहे, की 23 वर्षांनंतर देखील गदर 2 करत असताना तिच्या भूमिकेत शिरण्यासाठी मला फारशी तयारी करावी लागली नाही. सकीना तर माझ्या नसानसांत भिनली आहे. तिच्याशी माझे अगदी जिवाभावाचे नाते आहे. मला वाटते गदर एक असा कालातीत चित्रपट आहे, जो पुन्हा पुन्हा बघताना देखील आनंद देतो. भारताच्या एकत्रित मानसाचा तो एक भाग झाला आहे. त्यामुळे मला पुन्हा गदर चित्रपटाच्या आठवणी जगवण्याची गरज भासली नाही, कारण सकीनाचे सत्व माझ्यात रुजले आहे.”