फराह खानने सांगितली महान डान्सर हेलनसाठी कोरिओग्राफी केल्याची आठवण 

सोनी एन्टरटेन्मेंट टेलिव्हिजनवरील ‘इंडियाज बेस्ट डान्सर 3’ या डान्स रियालिटी शोमध्ये ‘डान्स का फेस्ट’ अंतर्गत डान्स मस्ती आणखी वाढवत या आठवड्याला ‘सिनेमा के 110 साल, बेमिसाल’ थीमवर बॉलीवूडच्या महान कलाकारांना सलामी देण्यात येणार आहे. यावेळी, स्पर्धक आपल्या कोरिओग्राफरसह भारतीय चित्रपटातील महान कलाकार जसे की, राज कपूर, किशोर कुमार, शम्मी कपूर, आर. डी. बर्मन तसेच बॉलीवूडमधल्या लोकप्रिय जोड्या धर्मेंद्र-हेमा मालिनी आणि ऋषी कपूर नीतू सिंह यांच्या गाण्यांवर परफॉर्म करताना दिसतील. हा सोहळा आणखीन 

रंजक करण्यासाठी चित्रपट क्षेत्रात मोठे योगदान देणारी प्रसिद्ध दिग्दर्शक आणि कोरिओग्राफर फराह खान या भागात येणार आहे.

स्पर्धक शिवम वानखेडे आणि कोरिओग्राफर सोनाली कर यांची ब्लॉकबस्टर जोडी ‘तूफानी’ परफॉर्मन्स देऊन वातावरण रंगतदार करताना दिसेल. ते दोघे शम्मी कपूरच्या ‘ओ हसीना जुल्फोंवाली’ गाण्यावर परफॉर्म करताना दिसतील. फराह खान त्यांचा तो दमदार अॅक्ट पाहून आणि शम्मी कपूर आणि हेलन या दोन महान डान्सर्सने पडद्यावर साकारलेले ते गाणे इतके निर्दोषपणे सादर करताना पाहून चकित झालेली दिसेल. त्या दोघांचे कौतुक करताना फराह खान म्हणाली,“तुम्ही दोघे अप्रतिम नाचलात. जर हेलन आँटी आणि शम्मीजींनी तुम्हाला डान्स करताना पाहिले असते, तर तुमचे भविष्य उज्ज्वल आहे असे भाकीत त्यांनी नक्कीच केले असते.”

आपण लहान असताना हेलनसारखा डान्स करायला आपल्याला किती आवडायचा याची आठवण सांगताना फराह खान म्हणाली,“मी जेव्हा लहान होते, तेव्हा घरातल्या टेबलावर चढून हेलनच्या गाण्यांवर डान्स करत असे. माझ्या घरी कुणी आले की, माझे आईवडील मला त्यांना हेलनच्या मूव्ह्ज करून दाखवायला सांगत असत. आम्ही जेव्हा मोहब्बतें चित्रपटाचे शूटिंग करत होतो, त्यातील एका गाण्यात ‘मोनिका’ असा उल्लेख आहे आणि हेलनजी एक डान्स करण्यासाठी येणार होत्या. मी इतकी बावरून गेले होते की मी गीताला सांगितले की हेलनजींना रुटीन समजावून दे. जेव्हा ते सगळे जण तालिम करत होते, तेव्हा मी मात्र एक कोपऱ्यात उभी राहून रडत होते, कारण मला माझ्या लहानपणीच्या आयडॉलसोबत काम करायची संधी मिळाली होती. माझ्याकडे पाहून गीताला देखील रडू फुटले. मला वाटते, आम्ही खूप नशीबवान आहोत की, आम्हाला हेलन आँटीसोबत काम करण्याची संधी मिळाली.”

पुस्ती जोडत गीता कपूर म्हणाली,“हेलनजींसोबत काम करणे हा फारच भारावून टाकणारा अनुभव होता. तो क्षण म्हणजे आमच्यासाठी आनंदाचा ठेवा आहे. हेलनजींनी इतक्या सहजतेने परफॉर्म केले! तुमच्या कोरिओग्राफीवर तुमच्या आयडॉलला थिराकताना पाहणे हा विशुद्ध आनंदाचा क्षण होता. आज शिवम आणि सोनालीने त्या गाजलेल्या गाण्यावर ज्या प्रकारे परफॉर्म केले, ते अप्रतिम होते. मस्त कामगिरी शिवम आणि सोनाली! डान्स आणि कोरिओग्राफी दोन्ही अफलातून होते.”