…तर उद्धव आणि रश्मी ठाकरे हे संजय राऊतांना चप्पलेने मारतील : नारायण राणे

मुंबई : ‘मी खासदार झाल्यानंतर संजय राऊत हे माझ्याकडे आले आणि उद्धव ठाकरे आणि रश्मी ठाकरे यांच्याबद्दल जे काही बोलले, ते मी उद्धव यांना एकदा भेटून सांगणार आहे. मी ते सांगितल्यानंतर उद्धव आणि रश्मी हे दोघेही राऊतांना चप्पलेने मारतील,’ असा घणाघात नारायण राणेंनी केला आहे. संजय राऊत यांनी काल एकेरी उल्लेख करत आव्हान दिल्यानंतर आज नारायण राणे यांनीही जोरदार प्रत्त्युत्तर देत एक खळबळजनक दावा केला आहे. शिवसेना उद्धव बाळासाहेब ठाकरे या पक्षाचे नेते व खासदार संजय राऊत आणि भाजप नेते व केंद्रीय मंत्री नारायण राणे यांच्यात सुरू असलेला राजकीय वाद आता आणखीनच चिघळला आहे.
सुरक्षेविना फिरून दाखवा, असं आव्हान संजय राऊत यांनी नारायण राणेंना दिलं होतं. हे आव्हानही राणे यांनी स्वीकारलं आहे. ‘संजय राऊत यांनी मला सुरक्षेविना फिरण्याचं आव्हान दिलं. कुठे यायचं हे राऊतांनी सांगावं, मी आजच तिथे यायला तयार आहे,’ असं ते म्हणाले. ‘माझा इतिहास शिवसेना घडवण्यामध्ये आहे, शिवसेना संपवण्यामध्ये नाही. संजय राऊतांनी शिवसेना संपवण्याची सुपारी घेतली, आज त्यांना शिवसेना संपवण्याचाच आनंद होत आहे.
शिवसेनेचे राज्यात ५६ आमदार होते. आता फक्त १२ उरले आहेत आणि ते उरलेले घालवण्यासाठी राऊत तयार आहेत,’ अशा शब्दांत राणेंनी समाचार घेतला आहे. ‘आम्ही विकासाचं राजकारण करत आहोत. राज्याचा विकास व्हावा, रोजगारनिर्मिती व्हावी, यासाठी मी आणि माझा पक्ष प्रयत्न करत आहे. मात्र संजय राऊत यांचं एक तरी विधायक काम दाखवा,’ अशा असा हल्लाबोलही नारायण राणे यांनी यावेळी केला.