no images were found
शिवाजी विद्यापीठात बुधवारपासून तीनदिवसीय ‘आयसीपीएम-एमडीएफ-२०२५’ आंतरराष्ट्रीय परिषद संरक्षण आणि अवकाश संशोधनावर विशेष भर: प्रा. (डॉ.) आर. जी. सोनकवडे
कोल्हापूर,(प्रतिनिधी): शिवाजी विद्यापीठाच्या भौतिकशास्त्र अधिविभागामार्फत “५ वी आंतरराष्ट्रीय परिषद: फिजिक्स ऑफ मटेरियल्स अँड मटेरियल्स बेस्ड डिव्हाइस फॅब्रिकेशन” (आयसीपीएम-एमडीएफ-2025) आयोजित करण्यात आली आहे. ही अत्यंत महत्त्वपूर्ण परिषद दिनांक १० ते १२ डिसेंबर २०२५ या तीन दिवसांच्या कालावधीत संपन्न होणार आहे. या आंतरराष्ट्रीय परिषदेचे अध्यक्ष आणि शिवाजी विद्यापीठाच्या भौतिकशास्त्र विभागाचे प्रमुख डॉ. राजेंद्र सोनकवडे यांनी ही माहिती दिली.
या परिषदेत जगभरातील नामवंत संशोधक, शास्त्रज्ञ आणि विचारवंत सहभागी होणार असल्याने, राष्ट्रीय स्तरावरील विद्यार्थी, संशोधक आणि शिक्षकांना आंतरराष्ट्रीय पातळीवरील तज्ज्ञांचे थेट मार्गदर्शन मिळण्याची आणि त्यांच्याशी संवाद साधण्याची एक दुर्मिळ सुवर्णसंधी उपलब्ध होणार आहे. या ज्ञानाच्या देवाणघेवाणीतून नवीन संकल्पनांचा उगम होईल आणि त्यातूनच भविष्यातील संशोधनाची नवी दिशा निश्चित केली जाईल, असा विश्वास डॉ. सोनकवडे यांनी व्यक्त केला आहे.
त्यांनी दिलेल्या माहितीनुसार, या परिषदेसाठी जगाच्या विविध देशांतील संशोधक कोल्हापुरात येणार आहेत. यामध्ये प्रामुख्याने तंत्रज्ञानात आघाडीवर असलेल्या जपान आणि दक्षिण कोरियापासून ते युरोपातील जर्मनी, स्वीडन आणि आयर्लंडसारख्या संशोधनप्रधान देशांतील शास्त्रज्ञांचा समावेश आहे. तसेच ऑस्ट्रेलियाच्या प्रगत संशोधन संस्था आणि दक्षिण अमेरिकेतील चिली या देशातील तज्ज्ञ देखील या महोत्सवात आपली उपस्थिती नोंदवणार आहेत. केवळ आंतरराष्ट्रीयच नव्हे, तर राष्ट्रीय स्तरावरील बुद्धिमत्तेचा संगम देखील येथे पाहायला मिळणार आहे. म्हैसूर, आंध्र प्रदेश, इंदूर, मुंबई, पुणे आणि कोल्हापूर यांसारख्या भारतातील प्रमुख शैक्षणिक आणि संशोधन केंद्रांमधील संशोधक या परिषदेत आपले शोधनिबंध सादर करतील.
भारताला जागतिक महासत्ता बनविण्याच्या दृष्टीने आणि ‘आत्मनिर्भर भारता’चे स्वप्न प्रत्यक्षात उतरविण्यासाठी विज्ञान आणि तंत्रज्ञानातील संशोधन, विशेषतः ‘मटेरियल्स सायन्स’ आणि ‘डिव्हाइस फॅब्रिकेशन’ या क्षेत्रांचे योगदान अनन्यसाधारण आहे. याच उद्देशाने प्रेरित होऊन, या परिषदेत संरक्षण सज्जता, अवकाश संशोधनातील आव्हाने आणि प्रगत बॅटरी तंत्रज्ञान यांसारख्या राष्ट्रीय आणि आंतरराष्ट्रीय महत्त्वाच्या विषयांवर सखोल विचारमंथन घडवून आणले जाणार आहे. शिवाजी विद्यापीठाचा भौतिकशास्त्र विभाग हा मटेरियल्स सायन्सच्या संशोधनामध्ये केवळ महाराष्ट्रातच नव्हे, तर संपूर्ण भारतात अग्रेसर मानला जातो, आणि या विभागाची ही गौरवशाली परंपरा या परिषदेच्या माध्यमातून जागतिक पटलावर अधिक ठळकपणे अधोरेखित होणार आहे.
परिषदेच्या यशस्वी नियोजनासाठी शिवाजी विद्यापीठाच्या भौतिकशास्त्र अधिविभागाची संपूर्ण टीम परिश्रम घेत आहे. परिषदेचे समन्वयक डॉ. एन. एल. तरवाळ आणि सहसमन्वयक डॉ. व्ही. एस. कुंभार यांच्या नेतृत्वाखाली नियोजनाचे काम सुरू आहे. परिषदेचे सचिव प्रा. (डॉ.) ए. व्ही. मोहोळकर आणि खजिनदार डॉ. आर. एस. व्हटकर यांच्यासह प्रा. (डॉ.) के. वाय. राजपुरे, डॉ. एम. व्ही. टाकळे, डॉ. एस. पी. दास, डॉ. एम. आर. वाईकर, डॉ. ए. आर. पाटील आणि डॉ. एस. एस. पाटील हे सर्वजण या उपक्रमाला यशस्वी करण्यासाठी परिश्रम घेत आहेत.
