सार्वजनिक उत्कृष्ट गणेशोत्सव पुरस्कारासाठी 31 ऑगस्टपूर्वी अर्ज करा

कोल्हापूर : पर्यटन व सांस्कृतिक कार्य विभागाने राज्यातील सार्वजनिक उत्कृष्ट गणेशोत्सव मंडळांना पुरस्कार देण्याबाबत घोषणा केली आहे. यानुसार पुरस्कारासाठी जिल्ह्यातील धर्मादाय आयुक्त यांच्याकडे नोंदणी केलेल्या किंवा स्थानिक पोलीसांकडे परवानगी घेतलेल्या किंवा स्थानिक स्वराज्य संस्थांची परवानगी घेतलेल्या सार्वजनिक गणेशोत्सव मंडळांना सहभागी होता येणार आहे. पुरस्कारासाठी जिल्ह्यातील सार्वजनिक गणेशोत्सव मंडळांनी पु.ल. देशपांडे महाराष्ट्र कला अकादमी, मुंबई यांच्या mahotsav.plda@gmail.com या ईमेल वर दि. 31 ऑगस्ट 2024 पूर्वी ऑनलाईन अर्ज सादर करावेत, असे आवाहन सांस्कृतिक कार्य मंत्री सुधीर मुनगंटीवार यांनी केले आहे.

 वरील बाबीची पूर्तता करणा-या, करु शकणा-या सार्वजनिक गणेशोत्सव मंडळांनी करावयाच्या अर्जाचा नमुना पर्यटन व सांस्कृतिक कार्य विभाग शासन निर्णय दि. 31 जुलै 2024 च्या निवडीचे निकष, अर्ज उपलब्ध करुन देण्यात आला आहे. या स्पर्धेसाठी सहभागी गणेशोत्सव मंडळानी केलेल्या कार्याबाबतचा कालावधी हा सन 2023 च्या अनंत चतुदर्शी ते सन 2024 च्या गणेश चतुदर्शी पर्यंतचा असणार आहे.

जिल्हाधिकारी अमोल येडगे यांच्या समन्वयाखाली नियुक्त निवासी उपजिल्हाधिकारी संजय तेली यांच्या अध्यक्षतेखाली जिल्हास्तरीय समिती व प्रत्येक तालुका निहाय तहसिलदार यांच्या अध्यक्षतेखाली तालुकास्तरीय समिती जिल्ह्यातील ऑनलाईन अर्ज सादर केलेल्या सार्वजनिक गणेशोत्सव मंडळांना गणेशोत्सव काळात भेट देईल. या समितीला मंडळांनी आपल्या कार्यक्रमाचे फोटो, अहवाल, व्हिडिओग्राफ भेटीवेळी सादर करावेत.

स्पर्धेसाठी जिल्हास्तरावरुन राज्यस्तरावर निवड होणा-या एका सार्वजनिक गणेशोत्सव मंडळाला 25 हजार रुपयांचे पारितोषिक व प्रमाणपत्र सन्मानपूर्वक वितरीत करण्यात येणार असून यात सन 2024 मध्ये राज्यातील पहिल्या 3 विजेत्या गणेशोत्सव मंडळांना राज्य शासनाकडून अनुक्रमे प्रथम क्रमांक 5 लाख रुपये, व्दितीय क्रमांक 2.50 लाख व तृतीय क्रमांक 1 लाख रुपये असे आहे. जिल्ह्यातील जास्तीत जास्त सार्वजनिक गणेशोत्सव मंडळांनी या स्पर्धेत सहभागी व्हावे, असे आवाहन निवासी उपजिल्हाधिकारी तथा सन 2024 सार्वजनिक गणेशोत्सव मंडळ स्पर्धा पुरस्कार समितीचे अध्यक्ष संजय तेली यांनी केले आहे.