कोल्हापूर  (प्रतिनिधी):  शिवाजी विद्यापीठाच्या पद्मश्री डॉ. ग. गो. जाधव पत्रकारिता अध्यासनाच्यावतीने सुरू असलेल्या सर्टिफिकेट कोर्स इन डॉक्युमेंटरी फोटोग्राफी या कोर्सच्या विद्यार्थ्यांनी काढलेल्या छायाचित्रांचे प्रदर्शन विद्यापीठात भरवण्यात येत आहे. कुलगुरू प्रा. डॉ. डी. टी. शिर्के यांच्या हस्ते शनिवार, दि. 19 ऑगस्ट 2023 रोजी सकाळी 11.45 वाजता अध्यासन इमारतीत ‘स्पार्क फोटोग्राफी प्रदर्शना’चे उद्घाटन होईल.

 

पत्रकारिता अध्यासनात दीड महिन्यापूर्वी डॉक्युमेंटरी फोटोग्राफी हा सर्टिफिकेट कोर्स सुरू झाला. या कोर्सच्या विद्यार्थ्यांनी फिल्डवर जाऊन शिक्षकांच्या मार्गदर्शनाखाली छायाचित्रे काढली आहेत. त्यातील निवडक छायाचित्रांचे प्रदर्शन विद्यापीठात भरवण्यात येत आहे. यासाठी फोटोग्राफीचे शिक्षक विराज चव्हाण, जयसिंग चव्हाण, अभिजीत गुर्जर, अतुल शहा आदी परिश्रम घेत आहेत. हे प्रदर्शन आठ दिवस सर्वांसाठी खुले असेल. कार्यालयीन वेळेमध्ये प्रदर्शन पाहण्यासाठी फोटोग्राफीची आवड असणाऱ्यासह पत्रकार, छायाचित्रकार आणि अन्य नागरिकांनी यावे, असे आवाहन अध्यासनाचे समन्वयक डॉ. शिवाजी जाधव यांनी केले आहे.