अखिल भारतीय चित्रपट महामंडळाच्या निवडणुकीत सत्तारूढ आघाडीच्या समर्थ पॅनलचा एकतर्फी विजय

Oplus_131072

अखिल भारतीय चित्रपट महामंडळाच्या निवडणुकीत सत्तारूढ आघाडीच्या समर्थ पॅनलचा एकतर्फी विजय
कोल्हापूर (प्रतिनिधी):- गेली तीन महिने आरोप प्रत्यारोपाने गाजत असलेल्या अखिल भारतीय चित्रपट महामंडळाच्या निवडणुकीत सत्तारूढ आघाडीने जोरदार मुसंडी मारत सर्वच्या सर्व जागांवर विजय मिळवला. पॅनेल प्रमुख – माजी अध्यक्ष या मेघराज भोसले यांच्या मार्गदर्शनाखाली लढलेल्या समर्थ पॅनलने प्रतिस्पर्ध्यांचा पूर्णपणे पराभव करत महामंडळावर आपले निर्विवाद वर्चस्व कायम राखले.
या निवडणुकीत समर्थ पॅनलच्या उमेदवारांना सभासदांचा मोठा पाठिंबा मिळाला. त्यामुळे अध्यक्ष, उपाध्यक्ष तसेच विविध पदांसाठीच्या सर्व जागांवर समर्थ पॅनलचे उमेदवार विजयी झाले. या विजयामुळे चित्रपट महामंडळाच्या कारभारावरील सत्तारूढ आघाडीची पकड अधिक मजबूत झाली आहे.
विजयानंतर समर्थ पॅनलच्या कार्यकर्त्यांनी आणि समर्थकांनी जल्लोष साजरा केला. फटाक्यांची आतषबाजी, मिठाई वाटप आणि घोषणाबाजी करत त्यांनी आनंद व्यक्त केला. यावेळी अध्यक्ष मेघराज भोसले यांनी सर्व सभासदांचे आभार मानत हा विजय चित्रपट क्षेत्रातील सर्व घटकांचा असल्याचे सांगितले.
महामंडळाच्या माध्यमातून चित्रपटसृष्टीतील कलाकार, तंत्रज्ञ, निर्माते व इतर घटकांच्या हितासाठी अधिक जोमाने काम करण्यात येईल. सभासदांनी दाखविलेला विश्वास सार्थ ठरवण्यासाठी आम्ही कटिबद्ध आहोत,” असे मेघराज भोसले यांनी विजयाबद्दल प्रतिक्रिया देताना सांगितले.
या निकालामुळे आगामी काळात अखिल भारतीय चित्रपट महामंडळाच्या धोरणांवर आणि विकासात्मक उपक्रमांवर समर्थ पॅनल ने निवडणुकीत दिलेली आश्वासने ‘मराठी चित्रपट सृष्टी विकास ‘ विषय केंद्रित ठेवून पूर्ण करावी अशी अपेक्षा सभासद व्यक्त करीत आहेत .सत्ताधारी समर्थ पॅनेलचे विजयी उमेदवार असे – निर्माता मेघराज राजे भोसले – सुनील महाजन – दिग्दर्शन दीपक कदम अजय शिरोळे शफी काझी धनाजी यमकर विजय खोचीकर सुशांत शेलार वर्षा उसगावकर प्रवीण पाटील प्रल्हाद शिंदे सुभाष नकाशे शरद चव्हाण रविंद्र गावडे चैत्राली डोंगरे गणेश गारगोटे आणि विकास तोरणे ही सर्व निवडणूक प्रक्रिया यशस्वी पार पाडण्यासाठी सर्व उमेदवार तसेच प्रशासन यांनी दिलेल्या सहकार्याबद्दल निवडणूक अधिकारी रागिनी कडपे यांनी सहाय्यक रवींद्र बोरपाळकर यांच्या समवेत सर्वाचे आभार मानले आहेत .